ගුවන්විදුලි ශිල්පියෙකු සමඟ ගෙවුණු සැඳෑවක්

ගුවන්විදුලි ළමා පිටියෙහි හඬ පරීක්ෂණයක් මඟින් තේරී පත් වී ළමා ශිල්පියෙකු ලෙස ලත් දැනුම අත්දැකීම්, පළපුරුද්ද පසුකාලීන ව ගුවන්විදුලි ක්‍ෂේත්‍රයේ හරඹ කරන්නෙකු ලෙස ශ්‍රාවක හදවත්වල අමරණීය නමක් හිමි කරගත් කරුණාරත්න අමරසිංහයන් සමග යෙදුණු සල්ලාපයක් ඇසුරින් මෙම ලිපිය සකස් කෙරිණි. 

• කුඩා අවධියේ  ගුවන්විදුලි ශ්‍රාවකයෙකු ලෙස ඔබේ අත්දැකීම් මොන වගේ ද ?

මුලින් ම ළමයෙක් විදිහට තමයි මම ගුවන්විදුලියට පය තබන්නේ. මා ගුවන්විදුලියට යන කොට අපේ ගෙදර ගුවන්විදුලියක් තිබුණෙ නැහැ. තිබුණෙ මොකක්ද කිෂිල්ස් එකක් තමයි තිබුණේ. කිෂිල්ස් එක කියන්නේ ගල් විශේෂයක්. ඒක ලෑලී කෑල්ලක හයිකරලා තඹ කම්බි ගොඩක් දාලා හදන එකක්. ඒරියල් එකක් දානවා. එහෙම තමා මම මුලින් ම ගුවන්විදුලිය ඇහුවෙ. මේකෙන් ලංකාවේ හිටපු උගතුන් සාහිත්‍යය ගැන කතා කරනවා, භාෂාව ගැන කතා කරනවා.  ඒ කතා කරන සියලු‍ දෙනා භාෂාව සාහිත්‍යය හොඳට හදාරන අය වුණා. එතකොට නිකම් ම ආශාවක් ඇති වෙනවා භාෂාව මනාව හසුරුවන්න. ඔහු එහෙම කීවේ ඔහුගේ මතකයට නැගුණු සංස්කෘක ශ්ලෝකයක් ද කියම්නි.

 වසන්ත  මදනෝද මාද මුකර........... 

ඒ කාලේ හරිම  ආකර්ෂණීය විදිහට ගුවන්විදුලියෙන් භාෂාව ගෙන එනවා. ඒ කියන්නේ භාෂාව ඉගෙන ගන්න ඕනේ. විධිමත් අධ්‍යාපනය ලබාදෙන්න මාධ්‍ය බොහොමත් ම රුකුලක් වුණා. එක් අතකට මේක විවෘත  විශ්වවිද්‍යාලයක් වගේ වෙනම ජීවයක් ලබාදෙනවා.  ඔහොම තමා  ශ්‍රාවකයෙකු විදිහට  මම ගුවන්විදුලියට සම්බන්ධ වෙන්නේ.

• ඔබතුමා ළමා ශිල්පියෙකු වශයෙන් ළමා පිටියට සම්බන්ධ වෙනවා කිව්වනෙ. ඒ අත්දැකීම ඔබට කොහොමද  දැනෙන්නේ?

අන්න ඒක හොඳ ප්‍රශ්නයක්. ඒ කාලේ ඉස්කෝලේ මගේ යාළුවෙක් හිටියා වෝල්ටර් කල්දේරා කියලා. එයා නිරන්තරයෙන් ම ළමා පිටියට කතා, ප්‍රවෘත්ති, විද්‍යාඥයෝ ලෝක සාහිත්‍යය ගැන ලියනවා. දවසක් වෝල්ටර් මට  කිව්වා ගුවන් විදුලි ළමා පිටියට එයාට එන්න කියලා ආරාධනාවක් කළා කියලා.  එතන දී එයාගේ නිර්මාණ එයාටම ඉදිරිපත් කරන්න ආරාධනා කරල තියෙනවා.  ඒක  ඉතින්  ලොකුම වරප්‍රසාදයක්. වෝල්ටර් ඉතින් මට කිව්වා යමු කියලා. මම  පස්වනක් ප්‍රීතියෙන් පිනා ගිහිල්ලා  වෝල්ටර් එක්ක ගියා  ළමා පිටියට. ඉදිරිපත් කළේ ගුවන්විදුලි සංස්ථාවේ දහවෙනි මැදිරියේ. ඒ කාලේ ළමා පිටිය දවස් හතේම තිබුණා. අපි ගියපු ළමා පිටිය තිබුණේ බදාදාට. ඒක ඉදිරිපත් කළේ, ගුවන්විදුලිය පැත්තෙන් තිලක් සුධර්මන් ද සිල්වා කියන දක්ෂ ප්‍රවෘත්ති නිවේදකයෙක්. මෙතුමා වැඩසටහනට ඉස්සෙල්ලා පුහුණුවක් ගන්නවා. අනික ඒ කාලේ මේ රෙකෝඩින්  මොකක්වත් නෑ. කෙලින් ම  සජීවීව තමා යන්නේ. ජීවිතේට ගුවන්විදුලියට පය ගහලා නැති මට එදා ළමා ශිල්පියෙකු ලෙස වැඩ කරන්නා සිදුවුණා.  ඒ මදිවට මයික් එකක් ගාව කතා කරන්නත් ඕනේ. බැරිවුනොත් සමාව ඉල්ලන්නත් බෑනේ. ඒක හරිම අභියෝගයක්. අපි පුහුණු වෙන වෙලාවේ වෝල්ටර් අයිසෙක් නිව්ටන් ගැන තමයි ලියලා තියෙන්නේ. ඉතින් මේක ඉදිරිපත් කරන්නේ වෝල්ටර්. මොකක් හරි වාසනාවකට මේකෙ තියෙනවා එක දෙබසක් අයිසෙක් නිව්ටන් කතාකරන. ඉතින් මේ දෙබස කියන වෙලාව ආවා. සුදර්මන් අයියා එකපාරට   මල්ලී ඔයා මේ දෙබස කියන්න  බලන්න”. පස්සේ මං මේක කීවා.  ආ හරි ෂෝක්නේ මල්ලි  හොඳට කිව්වා” ඉස්සෙල්ලාම මගේ හඬ ගුවනට ගියේ එදා. සර් අයිසෙක් නිවුටන්ගේ දෙබසින්. සුදර්මන් අයියා තමා ඉස්සෙල්ලා ම මගේ හඬ ගුවන්විදුලියට යැව්වේ. වෝල්ටර් කල්දේරාගේ ලිපියේ තමයි දෙබස තිබුණේ. ඔන්න මම මුලින් ම ළමා ශිල්පියෙකු වුණ හැටි.

• ගුවන්විදුලි ළමා ශිල්පියා පසු කාලයේ නාට්‍ය ශිල්පියෙක් වුණේ කොහොමද?

 මම ළමා ශිල්පියෙකු විදිහට සහභාගි වෙන එක්තරා රැයක අර කිෂිල්ස් සෙට් එකෙන් ම මට ඇහෙනවා නාට්‍ය ශිල්පීන් තෝරා ගැනීමේ පරීක්ෂණයක් තියෙනවා කියලා. හඬ පරීක්ෂණයක්, ඒක ඇහුණට  පස්සේ මට හරි පුදුම සතුටක් දැනුණේ. ඒ කාලෙ කොහොමද ශිල්පියෙක් තෝරා ගන්නේ කියන එක මතක තියාගන්න ඕනේ. හඬ මුලින් ම වැදගත් වන්නේ මේ නිසයි. ඊළඟ දවසේ මට ලියුමක් එනවා මාව තෝරගත්ත කියලා. අහවල් දවසේ එන්න කියලා තිබුණා. ගියාට පස්සේ පරීක්ෂණයට දෙනවා  "අ"යන්නක්. පොඩි කොලේක  "අ" ලියලා ඒකෙ උපදෙස් දීලා තියෙනවා "අ"ශබ්දයෙන් විවිධ හැඟීම් පළ කරන්න කියලා. මේක ඉතින් මුඛ පූට්ටු වෙන කතාවක් නේ.  මෙයාට නිර්මාණාත්මක ව හිතන්න පුළුවන්ද කියලා තමා බැලු‍වේ.

 ඒකෙන් පස්සෙ ඔන්න තුන්වෙනි පරීක්ෂණයටත් එන්න කිව්වා. එතන දි තමයි නාට්‍යය දෙබසක් දුන්නෙ  ඒකේ තිබුණේ අනේ මං කොහොමද මේ දේ ඔබට කියන්නේ’ අන්න මගේ  අවසාන පරීක්ෂණය. එහෙම තමයි මං ඉස්සෙල්ලා ම ගුවන්විදුලි නාට්‍ය ශිල්පියෙක් වුණේ. එය මගේ ජීවිතයට ලොකු ආලෝකයක් වුණා. එදා ඉඳලා ගුවන්විදුලි රඟමඬලේ තෝරාගත් ශිල්පීන්ගේ ලැයිස්තුවක් තිබුණා  ගුවන්විදුලි නාට්‍යවලට  නාට්‍ය ශිල්පීන් තෝරා ගන්න. මේකට පුහුණු වුණ අය තමා ගන්නේ. මමත් මේකට තේරුණා. මාත් එක්ක ආපු අයගෙන් නෙතලි නානායක්කාර මට ඉතාම ආදරයෙන් මතක් කරන්න පුළුවන්.

• ඒ වගේම ඔබතුමා හා ජාතික ගුවන්විදුලිය අතර පවතින අමතක නොවන සිදුවීම් මොනවාද?

  අමතක නොවන සිදුවීම් ගොඩක් තියෙනවා. සාමාන්‍යයෙන් ඔය නාට්‍ය ශිල්පියෙක් වුණාට පස්සේ  ඓතිහාසික සිදුවීමක් වෙලා තියෙනවා. ඒ කාලේ නාට්‍ය වැඩසටහන ගුවන්විදුලිරඟමඩල යි. ඒකට මුලින් ම නම දාලා තිබුණේ රේඩියෝ රඟමඬල කියලා. රේඩියෝ ඉතින් ඉංග්‍රීසි වචනයනේ. ඒ වෙනුවට ගුවන්විදුලි රඟමඬල කියලා වෙනස් කරා. එතකොට ගුවන්විදුලි රඟමඬල තමා ප්‍රධාන නාට්‍ය වැඩසටහන. ඒකට තමා අර ශිල්පීන් ව තේරුවේ. ඒ ඇරුණු කොට විශ්ව සාහිත්‍ය කියලා වැඩසටහනක් තිබුණා. නාට්‍යානුසාරී ව ඉදිරිපත් කරන්න. ඊළඟට ඔය අපේ පැරණි සාහිත්‍යයේ තියෙන සද්ධර්මරත්නාවලිය, සද්ධර්මාලංකාරය ඒ වගේ කතා අරගෙනත් නාට්‍යානුසාරී ව ඉදිරිපත් කළා. එවත් මගේ ජීවිතයේ අමතක නොවන ගුවන්විදුලි ආදරණීය  මතකයන් ය. ඒ හැරුණු කොට රහස් පරීක්ෂක නාට්‍ය තිබුණා. පස්සේ කෙටිකතා කියලා වෙනම නාට්‍ය කොටසක් තිබුණා. අපි කවුරුත් දන්නවනේ ගුවන්විදුලි මාධ්‍යය කියන්නෙ ම අසන්නාගේ මනසේ පින්තූර මැවෙන්න හඬ හැසිරවිය යුතු මාධ්‍යයක් කියලා. නාට්‍යයක් කරන්න ගියත් ප්‍රවෘත්තියක් කියන්න ගියත් ඔළුවෙ තියාගන්න ඕන මම කතා කරන්නේ අන්ධ පිරිසකට කියලා. අන්ධයන්ට ඇස් පේන්නෙ නැහැනේ. ඒ ගොල්ලො හඬ අහලා සිතින් මවා ගන්නවා. ඒ නිසා තමා කියන්නේ නිවේදන කලාවේ දී ගුවන්විදුලි නිවේදකයන්ගේ ඉදිරිපත් කිරීම් සහ රූපවාහනි නිවේදකයන්ගේ  ඉදිරිපත්  කිරීම් අහසට පොළොව වගෙ කියලා. රූපවාහිනියේ කතා කරන පුද්ගලයා පේනවා.  ගුවන්විදුලියෙන් කතා කරන පුද්ගලයා ඇමතිය යුත්තේ තනි පුද්ගලයෙකුට ය. මෙහි දී සාමූහික ව හිටියත් ගුවන්විදුලිය අහන්නේ තනි තනි ව ය. 

මාධ්‍ය කියන්නෙ හැමෝට ම කරන්න පුළුවන් දෙයක් නෙවෙයි. ඒක ප්‍රායෝගිකත්වය අවැසි දෙයක්. ගුවන්විදුලි රඟමඩල මගේ ජීවිතේට ම භාග්‍යයක් වූ  දෙයක් කොට තමා සලකන්නනෙ. එතන වේදිකා නාට්‍යවල විශිෂ්ට නිෂ්පාදකයකු වන සුගතපාල ද සිල්වා නාට්‍ය අංශය භාරව ආවා. ඔහු ඇවිල්ලා එතෙක් පැවති ගුවන් විදුලි නාට්‍යය මෝස්තරය වෙනස් කළා. ඒ නාට්‍යය ගොඩට අහුවුණා එක් තනි චරිතයක්. එය මගේ ජීවිතයේ අමතක නොවන සිදුවීමක් වුණා. මේ නාට්‍යයට තිබුණේ එක් තනි චරිතයකි. එකේ නම  කොනේ කාමරේ හෙවත් සිරකරුවෙකුගේ කතාව” මෙය පැය භාගයක ගුවන් විදුලි නාට්‍යයක්. එදත් අදත් තවම තනි චරිතයේ ගුවන්විදුලි නාට්‍යයක් ඉතිහාසයේ තිබී නොමැත. මේ තනි චරිතය ඉදිරිපත්  කළේ මමයි. ඒ අත්දැකීම ඉතාම වැදගත්. හෙට රෑ එල්ලන්න ඉන්න මිනිසෙකුගේ අද රෑ හිත කොහොමද, මයික් එක ඉදිරියේ ඉඳලා ස්ටූඩියෝ හතර කොනේම යමින් එමින් ඒ හැගීම් නිරූපණය කිරීම මා ගුවන්විදුලි  ජීවිතයේ ලබපු අමුතු ම ඓතිහාසික අත්දැකීම්ක් වුණා.

• ගුවන්විදුලි රංගන ශිල්පියකු වශයෙන්  ඔබතුමාට තරුණ තරුණියන්ගෙන් ලැබුණු ප්‍රතිචාර කොහොමද?

  ඔය  වකවානුව වෙනකොට ලංකාවේ තිබුණේ එක ගුවන්විදුලියයි. මේ දැන් වගේ පුද්ගලික නාලිකා තිබුණේ නැහැ. එතකොට මුළු ලංකාවෙ මිනිස්සු අහන්නේ මේ ගුවන්විදුලියයි. ඒ කාලයේ ජනප්‍රියම වැඩි දෙනා අහන වැඩසටහන් කිහිපයක් තිබුණා. ප්‍රවෘත්ති, බණ වගේ දේවල් මිනිස්සු අහනවා. ඒ හැරුණු විට ජනප්‍රිය ම වැඩසටහන ගුවන්විදුලි නාට්‍ය වුණා. අදත් ඒ රසිකයන් ඉතිරි වෙලා ඉන්නවා. ඒක මට ලොකු සතුටක්. සමහරු මගේ රූපය දැකලා නැහැ. ඒ කාලේ මේ ගුවන්විදුලි නාට්‍ය අහපු අය ඊට පසු කාලවල්වල මා ගමන් බිමන් යනකොට කතා කරන වෙලාවට නොයෙක් අවස්ථාවල මට කතා කරල මගේ නම කියනවා ඒ තරම් ඔවුනට මගේ හඬ මතකයෙහි රැඳිලා. සමහර නාට්‍යවල මගේ දෙබස් ඔවුන්  මතකයෙන්  කියනවා. ඒ කියන්නේ අසන්නාගේ   පරිකල්පනයට ගොඩක් වැදගත්  වෙන බවයි. තරුණ කාලේ තරුණ ප්‍රජාව කොතරම් හඬට ආකර්ෂණය වෙන්න ඇද්ද? ඒ අය හඬත් එක්ක මවාගන්න රූපත් සමග තමයි ආකර්ෂණීය වීම සිදුවෙන්නේ .එසේ හඬට ප්‍රිය කිරීම සමග බන්ධනයක් ඇති වේ. එක එක්කෙනා මා ඔවුනට ආවේණික විදිහට මාව මවාගෙන තියෙනවා.

• පසුගිය දිනක අහන්න ලැබුණා ප්‍රාදේශීය ගුවන් විදුලි සේවා වැසීමට යන කාරණාවක්. මේ ගැන ජ්‍යෙෂ්ඨ මාධ්‍යවේදියකු වශයෙන් ඔබතුමා දරන අදහස කුමක්ද?

 ඇත්තටම එය සම්පූර්ණ අපරාධයක්. ප්‍රාදේශීය සේවා ඔස්සේ කොච්චර දක්ෂ පරපුරක් බිහි වෙලා  ඉන්නවදරෑ දැන් ඔය කරුණාරත්න දිවුල්ගනේ ගායකයා තනිකරම රජරට සේවයෙන් ආවේ. එතකොට මහින්ද චන්ද්‍රසේකර වැනි ගීත රචකයන් ආවේ රජරට සේවයෙන්. අපේ ප්‍රධාන ගුවන්විදුලියට පසු කාලයේ බඳවා ගත් නිවේදක නිවේදිකාවෝ, නිෂ්පාදකයෝ, කාර්මික ශිල්පියෝ හුඟක් අය ප්‍රාදේශීය ගුවන්විදුලි සේවයෙන් තමා ඇවිල්ලා තියෙන්නෙ. දැන් බලන්නකෝ අද වගේ කාලෙක කොළඹ වැඩසටහන්වලට  අනුරාධපුර නුවර පැත්තේ ඉඳලා එන්න මොන තරම් වියදමක් යනව ද? කොහොමද එන්නේ ? අනික දැන් ඒ ඒ පළාත්වල ඉස්කෝලවල මොන තරම් දක්ෂ ළමයි ඉන්නව ද?  ළමයින්ගේ දක්ෂතා එළි දක්වන්න හොඳම තෝතැන්නක්  ප්‍රාදේශීය ගුවන්විදුලිය. ඒ නිසා ප්‍රාදේශීය ගුවන්විදුලිය ඕනෑම රටකට ඉතාම  අවැසි අංගයක් බවයි මට නම් හැඟෙන්නේ.

• ජාතික වශයෙන් වර්තමාන ගුවන්විදුලියේ ස්ථාවරත්වය පවත්වාගෙන යමින් අනාගතයේ එය ජාතික සම්පතක් වශයෙන් රැක ගැනීමට නම් ප්‍රතිපත්ති සම්පාදනය විය යුත්තේ කෙසේද?  ඒ සඳහා ඔබතුමාගේ අදහස් හා යෝජනා මොනවද?

 

නිදහසින් පසු මේ වෙනකම් ම කිසිම දේක ජාතික ප්‍රතිපත්තියක් නෑ. ඉන්දියාවේ ආණ්ඩුවක් පැරදිලා නව ආණ්ඩුවක් ආ කල අධ්‍යාපනය, සෞඛ්‍ය වෙනස් වන්නේ නෑ. නමුත් අපේ රටේ කිසිම දේක ජාතික ප්‍රතිපත්තියක් නෑ. මේ හැමදේක ම ව්‍යාප්තය උසස් තත්ත්වයකට ගේන්න නම් ජාතික සංස්කෘතික ප්‍රතිපත්තියක් තියෙන්න ඕනේ .ජාතික ප්‍රතිපත්තියක් නැතුව කිසි දෙයක් හදන්න බැහැ. අද කිසි  විටෙක අරමුණක් නැහැ. එතකොට ඔය මේ කසිබල් භාෂාවල් භාවිත කරන්නේත් නැහැ. අද ඕන කෙනෙකුට ඕන දෙයක් කළ හැකයි. නමුත් ජාතික ප්‍රතිපත්තියක්  තිබේ නම් එහෙම හොඳ ප්‍රමිතියකින් යුත් ගුවන්විදුලි නාළිකා බිහි වන්නට ඉඩ තිබුණා.

                                                                                                  සාකච්ජා කළේ  - ඉෂාරා විජේරත්න

ගුවන්විදුලි මාධ්‍ය ආචාරධර්ම

             ප්‍රවෘත්ති මාධ්‍යක් වශයෙන් වර්ධනය වූ ගුවන් විදුලිය භූගෝලීය සීමා අතික්‍රමණය කරමින් තොරතුරු වාර්තාකරණයට බැඳී සිටී.ගුවන්විදුලිය විනෝදාත්මක මාධ්‍යයක් වශයෙන් ජන ප්‍රසාදයට පත් වූ වත් ගුවන්විදුලි ප්‍රවෘත්ති වාර්තාකරණය තුළ දී මාධ්‍ය ආචාර ධර්ම පිළිබඳ ප්‍රමාණවත් අවබෝධයක් තිබීම වැදගත් වේ. ආචාර්ය මැකෙන්සි විස්තර කොට දක්වන ආකාරයට ආචාර ධර්ම යනු, අපගේ පරම වටිනාකම් ඇසුරින් එකක් පිළිබඳ සාකච්ඡා කිරීමකි.ආචාරධර්ම යන්න ඉංග්‍රීසි භාෂාවේ යෙදෙන" Ethics" ග්‍රීක භාෂාවෙන් බිඳී ආවකි.

යහපත අයහපත හොඳ නරක යුක්තිය අයුක්තිය පිළිබඳ වෙනස අවබෝධ කරගන්නට ආචාර ධර්ම මගින් පදනම නිර්මාණය කෙරේ.එනම් ආචාර ධර්ම යනු, පුද්ගලයා තමා තුළ වර්ධනය කරගත යුතු ගුණධර්ම විශේෂයක්ය.මාධ්‍ය ආචාරධර්ම බිඳ දැමීම දඬුවම් ලැබීමට හේතුවක් නොවේ.ඒ ආචාරධර්ම නීති නොවන නිසාය.කෙසේ නමුත් මාධ්‍ය ආචාරධර්ම බිඳ දමමින් කටයුතු කරන්නා දෝෂදර්ශනයට ලක් වේ.මෙහිදී යහපත් ගුවන්විදුලි මාධ්‍යවේදියෙකු වශයෙන් මාධ්‍ය ආචාර ධර්ම රැකීම තමාගේ වගකීමක් කර ගැනීම තුළින් මාධ්‍ය හිතවාදී බව වර්ධනය කරගත හැකි වේ.මේ අනුව පැහැදිලි වන්නේ, ආචාරධර්ම යහපත් පැවැත්ම පදනම් කරගත් සංකල්ප සමුදායක් බවයි.බෞද්ධ ආගමික බලපෑම් මත ශ්‍රී ලංකා ආචාර ධර්ම වර්ධනය වී තිබේ.එසේම යුරෝපීය ආගමනයෙන් පසුව බටහිර ආගමික වටිනාකම් ද දේශීය ආචාරධර්ම පද්ධතිය වලට අවශෝෂණය කරගෙන තිබේ.ඒ අනුව පොදු ජාතික අර්බුද වල දී සර්ව ආගමික එකමුතු මතවාද ඉදිරිපත් වන්නේ මෙම පොදු ආචාර ආචාරධර්ම පද්ධතිය ප්‍රමාණවත් ලෙස ශක්තිමත් නිසාය.

මෙහි දී මාධ්‍යවේදියාගේ වගකීම වන්නේ, මෙම ආචාර ධර්ම පද්ධති නොනැසී පවත්වාගෙන යාමයි. ප්‍රබල විද්‍යුත් ජන මෙවලමක් වන ගුවන් විදුලි මාධ්‍යයේදී ගුවන්විදුලි ප්‍රවෘත්ති මාධ්‍යවේදීන් සුව කීය ආචාරධර්ම පද්ධති අවබෝධ කරගත යුතුය.ඒ අනුව වගකීම,පුවත්පත් නිදහස,අවංකභාවය, සාධාරණත්වය,අපක්ෂපාතීත්වය යන ප්‍රධාන ක්ෂේත්‍ර ඔස්සේ සලකා බැලේ.ගුවන්විදුලි ප්‍රවෘත්ති සම්පාදනයේදී මානව අයිතිවාසිකම් විශ්ව ප්‍රකාශනය,19වගන්තිය,1972 ශ්‍රී ලංකා ආණ්ඩුක්‍රම ව්‍යවස්ථාවේ 6 පරිච්ඡේදය, 1975 ශ්‍රී ලංකා ආණ්ඩුක්‍රම ව්‍යවස්ථාවේ 3පරිච්ඡේදය යනාදිය  මෙහිදී ඉතාම වැදගත් වේ.සත්‍ය හා අසත්‍ය ආරංචි අතර පවත්නා පරතරය මෙහිදී මා මාධ්‍යවේදීන් විසින් අවබෝධ කරගත යුතුය. නමුත් ශ්‍රාවකයා ආකර්ෂණය වන පරිදි සිරස්තල යොදා ගැනීම ආචාර් ධර්ම විරෝධී ක්‍රියාවකි.ආසියානු විද්‍යුත් සන්නිවේදනය සංගමය විසින් අනුමත කළ පොදු ආචාර ධර්ම සංග්‍රහය ශ්‍රී ලංකාවේ ගුවන්විදුලි මාධ්‍ය වේදීන්ට සෘජුව අදාල කර ගත හැකි ආචාරධර්ම පද්ධතියකි.ගුවන් විදුලි හා රූපවාහිනී සන්දේශ අරඹයා මේ සම්පාදනය වී ඇත.මීට අමතරව හොංකොංහි පැවති ආසියා-පැසිෆික් ගුවන්විදුලි වෘත්තිකයන්ගේ සමුළුවේ දී පළ කළ කළ ආචාර ආචාරධර්ම සංග්‍රහය ද ශ්‍රී ලංකාවට අදාළ ය.ආගම, ජනවාර්ගික විවිධත්වය, ලිංගිකත්වය,නීතිමය සලකා බැලීම් වන ක්ෂේත්‍ර ඔස්සේ එය සකස් වී ඇත.මාධ්‍යවේදීන්ගේ උනන්දුව මත නිර්මාණය වූ මෙම ආචාර ධර්ම පද්ධති  ශ්‍රී ලංකාවේ මාධ්‍යවේදීන් කටයුතු කලයුතු ආකාරය පිළිබඳ මැනවින් මග පෙන්වයි.

  

ගුවන්විදුලි මාධ්‍ය සඳහා ප්‍රවෘත්ති රචනා කිරීම.

   පූර්ණ ශ්‍රවණ මාධ්‍යයක් වූ,ගුවන්විදුලි මාධ්‍ය මුද්‍රිත මාධ්‍යට හා රූපවාහිනියට වඩා වෙනස් වූ මාධ්‍යයකි.ශ්‍රාවකයාගේ පරිකල්පනයට ඉඩහසර වෙන් කරන ගුවන්විදුලිය සජීවී මාධ්‍යකි.මෙහි දී අපිට වචන දැකීමේ හැකියාවක් නොමැති නිසා සාමාන්‍ය ජනතාවට වැටහෙන පරිදි සරල බස් වහරක් යොදා ගැනීම ඉතාම වැදගත් ය.ගුවන් විදුලි මාධ්‍ය සඳහා ප්‍රවෘත්ති රචනා කිරීමේ දී එය පහසුවෙන් ග්‍රහණය කරගත හැකි පරිදි රචනා වීම අසන්නාට පහසුවකි.ගුවන්විදුලි මාධ්‍ය හැඳින්වීමක දැකිය හැකි ගුණාංග කිහිපයක් ලෙස,වඩාත් වැදගත්ම ස්ථානයෙන් ප්‍රවෘත්ති ආරම්භ කිරීම.ග්‍රාහකයාගේ අවධානය රඳවා තබා ගැනීමට හැකිවීම.ඉදිරියේදී තවත් කරුණු දැනගැනීමට ඇති දැනගැනීමට ඇති කුතුහලය ඇති කිරීම.අසන්නා තුළ ඉදිරියට ප්‍රවෘත්ති ගලාගෙන යන්නේ කුමන දිශාවටද  යන හැඟීමක් ඇති කිරීම ප්‍රධාන වේ.  අප කවුරුත් දන්නා පරිදි   තොරතුරු සන්නිවේදන යාන්ත්‍රනය මගින් ග්‍රාහක පාර්ශවයේ දැනුවත් කිරීමේ ක්‍රියාවලිය  ප්‍රවෘත්ති මගින් සිදුවේ. එමෙන්ම   ප්‍රවෘත්ති යන්නට  නිශ්චිත වූ අර්ථකථනයක් නොමැති අතර  විවිධ පාර්ශව විවිධ ආකාරයෙන් ප්‍රවෘත්ති යන්න අර්ථකථනය කරයි.ඕනෑම සිදුවීමක් වටා   ගොඩනැගෙන උණුසුම් ම තත්ත්වය  ප්‍රවෘත්තියයි. මූලික වශයෙන් වාචික ප්‍රකාශන මාධ්‍යයක් හෙවත් ශ්‍රවණය ඇසුරු කොටගත් සන්නිවේදන කාරකයක් වෙන ගුවන්විදුලියේ ප්‍රවෘත්ති වාර්තාවක කරුණු සෑම විටම තාර්කික ලෙස ගොඩනැංවිය යුතු ය.මෙහි දී  කරුණු  සංඛ්‍යාත්මක වශයෙන් ඉදිරිපත් කිරීමට වඩා එම සංඛ්‍යා වලින් කියවෙන අරුත් පැහැදිලි කිරීම ගුවන්විදුලි ප්‍රවෘත්තිවල විශේෂත්වයකි. එමෙන්ම මෙහි දී පහසුවෙන් උච්ච්වාරණය  කළ හැකි වචන යොදා ගැනීම සිදුවේ.ගුවන්විදුලි ප්‍රවෘත්ති අයිතමයක පළමු වචනය ශ්‍රාවකයාට නෑසී යෑමේ සම්භාවිතාව වැඩි ය. එබැවින් වඩා වැදගත් වචනය පළමු වචනය ලෙස යොදා නොගත යුතු ය.

             කෙසේ නමුදු, ගුවන් විදුලි මාධ්‍ය සඳහා ප්‍රවෘත්ති රචනා කිරීමේ දී, සෑම විටම සරල වචන මෙන්ම කර්තෘ කාරක වාක්‍ය වැඩි වශයෙන් යොදා ගැනීම, ශක්තිමත් ආරම්භයක් ලබා ගැනීම, නාම විශේෂණ ක්‍රියා විශේෂණ යෙදීමෙන් වැළකී සිටීම,පුද්ගලයන් හැඳින්වීමේ දී සෑම විටම ඔවුන්ගේ තනතුරු නාමය ප්‍රථමයෙන් සඳහන් කිරීම මෙහි දී සැලකිල්ලට ගත යුතු කරුණු අතර වේ. 

                                         

ප්‍රජා සංවර්ධනයේදී ප්‍රජා ගුවන්විදුලිය

 වර්තමානයේ ශාස්ත්‍රඥයින්, සමාජ විප්ලව ක්‍රියාකාරිකයින් ,සිවිල් නායකයින්  යනාදීන් යොමුවන සංවර්ධන ක්ෂේත්‍රයක් ලෙස ප්‍රජා සංවර්ධනය පෙන්වා දිය හැකිය.  අනෙක් අතට සමාජ සාධාරණත්වය සහ එකිනෙකාගේ ආත්මගරුත්වය පදනම් කරගෙන ක්‍රියාකාරී මෙන්ම තිරසාර ප්‍රජාවක් ගොඩනංවනු ලබන පුළුල් ක්‍රියාවලිය ප්‍රජා සංවර්ධනය වේ. එහි දී ප්‍රජා ගුවන්විදුලියට ප්‍රධාන තැනක් හිමිවේ. ලොව වෙසෙන වඩාත් දරිද්‍රතාවෙන් පෙළෙන ප්‍රජාව කරා ළඟා වන ඔවුන් හා සම්බන්ධ වෙන වන වඩාත් ප්‍රායෝගික අඩු පිරිවැයකින් සාක්ෂාත් කරගත හැකි මාධ්‍යය වන්නේ ප්‍රජා ගුවන්විදුලියයි.

ප්‍රජා සංවර්ධනයේ දී ප්‍රජා ගුවන්විදුලිය යම් සුවිශේෂී කලාපයක ජීවත්වන ජන කණ්ඩායමක් හෝ එකම ජීවන අරමුණු අවශ්‍යතා හා රුචිකත්ව පෙරදැරි කරගත් ජන කණ්ඩායමක් පදනම් කරගෙන ඔවුන්ගේ සංවර්ධන ඉලක්ක ක්‍රියාත්මක කිරීම සිදු කෙරේ.තමන් ජීවත්වන ජීවත් වන ප්‍රජා කලාපය තුළට  අවශ්‍ය තුළට ප්‍රතිලාභ අරමුණු කරගෙන ප්‍රජා ගුවන්විදුලිය ප්‍රතිලාභ ලබන ප්‍රජාවගේ ම පාලනය ක්‍රියාකාරිත්වය, හිමිකාරිත්වය මෙන්ම ඔවුන්ගේ බලපෑම ඔස්සේ පවත්වාගෙන යයි. කාලොස් ආර්නල්ඩෝ (2001) දක්වන අන්දමට ප්‍රජා ගුවන් විදුලිය යනු, ප්‍රජාවේ සාමාජිකයන් සාමූහිකව හිඳ සන්දේශ සැලසුම් කිරීමටත්, ඒවා නිෂ්පාදනය කිරීමටත් ඉන් අනතුරුව ඒවා විසුරුවා  හැරීමත් කරනු ලබන සමාජය ක්‍රියාවලියකි යන්නයි. ජාතික ජනමාධ්‍ය පෝෂණය කිරීමෙහි ලා ඉවහල් වන ප්‍රජා ගුවන්විදුලියේ ලක්ෂණ ලෙස,

• පුරවැසියන්ගේ සහභාගිත්වය
• බහුතරයකගේ රසිකත්වය අනුව ක්‍රියාත්මක වීම
•  සෑම දෙනාගේම අදහස් හා මත වලට ගරු කිරීම
• සංස්කෘතික විධිමත්භාවය
• කාන්තාවන්ගේ කටහඬ ප්‍රසිද්ධිය සඳහා පාවිච්චි නොකිරීම
• අධිකාරි ආඥාදායකත්වය

පෙන්වා දිය හැකිය.ප්‍රජා සංවර්ධනයේ දී මූල්‍ය හෝ වෙළඳ  දැන්වීම් සඳහා ප්‍රමුඛතාව ප්‍රජා ගුවන් විදුලිය තුළ නොවන අතර සිවිල් සමාජයේ කැමැත්ත මත පවත්වාගෙන යාම මෙහි මූලිකම අවශ්‍යතාවයි. පිලිපීනයේ ලුවීටා බින්ග්ට අනුව,ප්‍රජා ගුවන් විදුලිය ප්‍රධාන ගුවන්විදුලියෙන් පහත කරුණු මත වෙනස් වේ.

ප්‍රචාරක ගුවන්විදුලිය      

1. Profit= ලාභය
2. Propaganda=ප්‍රචාරණය
3. Privilege=වරප්‍රසාද
4. Politics=දේශපාලනය

ප්‍රජා ගුවන්විදුලිය

1. People=මිනිසුන්
2. Participation=සහභාගිත්වය
3. Power=බලය
4. Pluralism=බහුවිධ භාවය  

  

ප්‍රජාතන්ත්‍රවාදය,සහභාගීත්වය යන මූලධර්ම මත ක්‍රියාත්මක වන ප්‍රජා ගුවන්විදුලිය සංවර්ධනය, අධ්‍යාපනය, මිනිසුන් බලගැන්වීම යන සාධක කෙරෙහි කැපවී ඇත.

ප්‍රජා ගුවන්විදුලියේ සංවර්ධනය කාර්‍රය පිළිබඳ තවදුරටත් විමසා බැලීමේදී ප්‍රංශය, ආජන්ටිකාව, ඔස්ට්‍රේලියාව යන රටවල සාර්ථකව ප්‍රජා ගුවන්විදුලිය ක්‍රියාත්මක වේ.එමෙන් ම සංවර්ධනය වෙමින් පවතින රටවල්  වන ආසියාතික රටවල ද ප්‍රජා ගුවන්විදුලිය  සාර්ථකව ක්‍රියාත්මක වේ. මේ අනුව බලන කල,ප්‍රජාව අතරේ පවතින, ප්‍රජාව සඳහා, ප්‍රජාව පිළිබඳ ප්‍රජාව විසින් ක්‍රියාත්මක කරනු ලබන ගුවන්විදුලිය සංවර්ධන කාර්යයේ දී ඉතාම වැදගත් ය.

 

කොත්මලේ ප්‍රජා ගුවන්විදුලිය

 

සංවර්ධනය වෙමින් පවතින රටවල් සිය සංවර්ධන ව්‍යාපෘති දියත් කිරීමේ දී සංවර්ධන සන්නිවේදන මාධ්‍යයක් ලෙස ගුවන්විදුලිය යොදා ගනී. එහිදී ප්‍රජා ගුවන්විදුලි මාධ්‍යයට ප්‍රධාන තැනක් හිමිවේ. මේ අතර කොත්මලේ ඉහළ කලාප වල පදිංචි ජනපදිකයින් ඉලක්ක කර මහවැලි ප්‍රජා ගුවන්විදුලි සේවාවක් ස්ථාපිත කිරීම සඳහා පරීක්ෂණ විකාශනයක් 1989.02.12 වන දින කොත්මලේ වේල්ල ට ඉහළින් ඉහළින් පිහිටි දෝරගල ගම්මානයේ ආරම්භ කෙරිණි. මේ ප්‍රජා ගුවන්විදුලිය 1989.02.27 දින විවෘත කලේ එවකට ඉඩම් සංවර්ධන හා මහවැලි අමාත්‍ය ව සිටි ගාමිණි අතුකෝරළ මහතා විසින් ය.

       මේ ප්‍රදේශයේ ජනතාවගේ ප්‍රධාන ජීවනෝපාය වූයේ තේ වගාවයි. ඊට අමතරව වී වගාව ,සත්ත්ව පාලනය, ආදිය මේ ප්‍රදේශයේ දැක ගතහැකි දැකගත හැකි වූ අතර කොත්මලේ  කඳුහෙල් වලින් යුක්ත ප්‍රදේශයක් නිසා ගම්මාන පිහිටා ඇත්තේ දුරස්ථව ය.

කොත්මලේ මහවැලි ප්‍රජා ගුවන්විදුලි විකාශනය අයහපත් වාතාවරණයක් මත 1989.06.21 වන දින තාවකාලිකව අත්හිටවූවත් 1990.02.20 දින නැවත ආරම්භ කරන ලදී. මෙහි වැඩසටහන් එෆ්.එම් 96.1 ඔස්සේ ප.ව.5.55 සිට 7.30 දක්වා ප්‍රචාරණය කෙරෙණි.කෙසේ නමුදු ප්‍රජා ගුවන්විදුලි සංකල්පයට පුළුල් අරුතක් ලබා දෙමින්, යහපත් මාධ්‍ය කරණයක් වෙනුවෙන් මෙම ප්‍රජා ගුවන්විදුලි සේවාව ජනමාධ්‍ය පුහුණු පාසලක් බවට පත් කිරීමට සංස්ථාව පියවර ගත්තේය.මෙම මාධ්‍ය ඇකඩමියේ විශේෂත්වය වනුයේ, එහි පුහුණුවන්නන්ට සජීවී පුහුණුව ලැබීමට අවස්ථාව ලබාදීමයි. ඒ අනුව මෙරට පිහිටුවා වඩා වැදගත් ප්‍රජා මාධ්‍යයක් ලෙස කොත්මලේ ප්‍රජා ගුවන්විදුලිය ශ්‍රාවක ජන හදවත් තුළ නොමැකෙන නමක් දිනා ඇත.

කොළඹ සිට කතා කළ කොළඹගේ මහතා

 

ඩී.එම් කොළඹගේ මහතා 

 " කොළඹ සිට කතා කරමි.මේ කොළඹ ගුවන්විදුලි සේවයයි."යන්න ඇසූ සැනණින් අපේ මතකයට එන්නේ,කොළඹගේ මහතා ය.මෙරට ශ්‍රාවක හදවත් දිනාගත් සාහිත්‍යයට,කලාවට සංස්කෘතියට සෙනෙහස දැක්වූ පුරෝගාමියෙකු ලෙස ඩී.එම් කොළඹගේ මහතා හැඳින්විය හැකිය.ලේඛකයෙකු කෙටිකතා කරුවෙකු වූ කොළඹගේ මහතා විටෙක වේදිකා හා සිනමා නළුවෙකු ද විය.

              පසුකාලීන ව ලංකා ගුවන් විදුලි සේවයේ,පාසල් වැඩසටහන් නිෂ්පාදකයකු,සන්ධ්‍යා සේවයේ අධ්‍යක්ෂ,සිංහල අංශයේ සංවිධායක ලෙස තනතුරු හෙබ වූ කොළඹගේ මහතා ක්‍රි .ව.1909 මැයි 4 වෙනි දා කොළඹ කිරුළුපන දී ඉපදුණේය.පවුලේ පස්වැනියා වූ ඩී.එම් කොළඹගේ කිරිල්ලපනේ බෞද්ධ මිශ්‍ර පාසලෙන් ද, වැල්ලවත්තේ ශ්‍රී වෛශාක්‍ය විද්‍යාලයෙන්ද,කොළඹ මහා විද්‍යාලයෙන් ද අධ්‍යාපනය ලබාගත් අතර හෙතෙම තම මුල්ම වෘත්තීය වශයෙන් තෝරා ගත්තේ ගුරු වෘත්තියයි.ක්‍රිස්තු වර්ෂ 1937 ජනවාරි පලවෙනි දින සිට මෙරට එකම සිංහල නිවේදකයා බවට පත්විය. බොහෝ පැතිකඩයන් ට සමත්කම් ද දැක්වූ ඩී .එම් කොළඹගේ මහතා ක්‍රිස්තු වර්ෂ 1954 වසරේ මලයා ගුවන්විදුලියේ විශේෂ පුහුණුවක් ලැබූවෙකු වූ අතර කිස්තු වර්ෂ 1962 බී.බී.සී දී බිතාන්‍ය ගුවන්විදුලියේ ද පුහුණුව ලැබුවේ යඑමෙන්ම ඩී .එම් කොළඹගේ මහතා ගුවන් විදුලියේ සන්ධ්‍යා  සේවයේ අධ්‍යක්ෂව සිටි කාලයේ ගුණාත්මක වැඩසටහන් නාට්‍ය ශ්‍රාවකයා වෙනුවෙන් නිෂ්පාදනය කළේය.නිදසුන් ලෙසින්,

1. ගුවන් ලියුම
2. ඔබේ ගැටලුව
3. ඇතුල් පැත්ත 

වැනි වැඩසටහන් ප්‍රමුඛ වේ.එමෙන්ම ඩී එම් කොළඹගේ මහතාගේ ජීවිතේ ජීවිතයේ අවසාන කාලයේ ලියූ ගුවන්විදුලි වංශ කතාව ලේඛන ජීවිතේ වැදගත්ම වංශ කතාවයි.නමුදු ක්‍රිස්තු වර්ෂ 1987 නොවැම්බර් 23 වෙනිදා වැනිදා කොළඹ ගේ නාමය තවදුරටත් ශ්‍රාවක ජනයා අතර තබමින් එතුමා මෙලොවින් සමුගත්තේය.

 

ලාංකීය ප්‍රජා ගුවන්විදුලි ඉතිහාසය සැකෙවින්

           

 ආසියාවේ ගුවන්විදුලි මාධ්‍ය බිහි කිරීමේ ප්‍රමුඛයා වනුයේ, ශ්‍රී ලංකාවයි එහි දී ජාතික තලයේ ගුවන්විදුලි සේවා, ප්‍රාදේශීය ගුවන් විදුලි සේවා පිළිබඳ අපි නිරන්තරයෙන්ම කතා කරන්නෙනෙමු.මේ සෑම ගුවන්විදුලි සේවාවක් තුලින් ම තුලින් ම ශ්‍රාවකයාගේ තොරතුරු සම්පාදනය උපදේශාත්මක සන්නිවේදනය,විනෝදාස්වාද සම්පාදනය පෙළඹවීම යනාදී අරමුණු ඉටු කෙරෙයි.මෙහි දී ලංකාවේ කැපීපෙනෙන ගුවන් විදුලි ධාරා තුළ නිශ්චිත ප්‍රජා කණ්ඩායමක් ලෙස හඳුනාගත් උප කුලක නැතහොත් වඩා කුඩා ග්‍රහ කණ්ඩායම්වල සුවිශේෂී අනන්‍යතා සපුරාලීමට උපකාරී වීම අරමුණු කරගත් ප්‍රජා ගුවන් විදුලි ව්‍යාපෘති දිවයිනේ විවිධ ප්‍රදේශවල විවිධ කාල වකවානුවල දී අපට හමුවේ ඒ අනුව බලන කල ප්‍රජා ගුවන්විදුලි සේවාවලින් ලැබෙන  මෙහෙය ද මිල කළ නොහැකිය.දකුණු ආසියාවේ මුල්ම ප්‍රජා ගුවන් විදුලිය ආරම්භ කිරීමේ ගෞරවය හිමි වන්නේ ශ්‍රී ලංකාවටයි. නමුත් වර්තමානයේ බොහෝ ප්‍රජා ගුවන් විදුලි නාලිකා ක්‍රියාත්මක නොවීම අවාසනාවකට කරුණකි.මෙහිදී ප්‍රජා ගුවන්විදුලි ලෙසින්,

• මහවැලි ප්‍රජා ගුවන්විදුලිය
• ගිරාදුරු කෝට්ටේ ප්‍රජා ගුවන්විදුලිය
• මහ ඉලුක්පල්ලම ප්‍රජා ගුවන්විදුලිය
• කොත්මලේ ප්‍රජා ගුවන්විදුලිය
•  පුලතිසිරාවය ප්‍රජා ගුවන්විදුලිය
• ඌව ප්‍රජා ගුවන් විදුලිය
• දඹාන ප්‍රජා ගුවන්විදුලිය

මේ ප්‍රජා ගුවන් විදුලි නාලිකා ප්‍රජාව සමඟ එක්වෙයි සමඟ එක්වී ප්‍ ප්‍රජාවේ ගැටළු  විසඳා ගනිමින් ප්‍රජාවට යහපත සැලසූ ආදරණීය හිතවතෙක් ලෙස සැලකිය හැකිය.

කොත්මලේ ප්‍රජා ගුවන්විදුලිය

             

          

දඹාන ප්‍රජා ගුවන්විදුලිය

ශ්‍රී ලංකාවේ ප්‍රාදේශීය ගුවන් විදුලි සේවා- 4( වයඹ රේඩියෝ )

 හස්තිශෛලපුර සන්නිවේදන සලකුණ වයඹ රේඩියෝව ක්‍රි.ව.2009 පෙබරවාරි 07 වන දින ආරම්භ වූයේ ,කුරුණෑගල මල්කඩුවාව නිශ්ශංක මාවතේ පිහිටි ගොඩනැගිල්ලක ය.එවකට ජනමාධ්‍ය අමාත්‍යඅනුර ප්‍රියදර්ශන යාපා මග පෙන්වීමෙන්ගුවන්විදුලි සංස්ථාවේ එවකට සභාපති හඩ්සන් සමරසිංහ මහතාගේ නායකත්වයෙන් මෙරට ලාබාලම ප්‍රාදේශීය ගුවන් විදුලි සේවය ඇරඹිණි.මෙහි ප්‍රථම අධ්‍යක්ෂකවරයා අධ්‍යක්ෂවරයා වූයේ ,ගාමිණි විජේවර්ධන මහතා ය.මෙහි ආරම්භක නිවේදක යුවල වශයෙන් එදා වයඹ හඬින් මුලින්ම ශ්‍රාවකයන් ඇමතුවේ, සම්මානනීය නිවේදක ප්‍රසන්න චන්දන  බණ්ඩාර  සමගින් සම්මානනීය නිවේදිකා කුමාරි ගුණරත්න ය.එමෙන්ම එදා සිට අද දක්වාම වයඹ රෙඩියෝ  සටහන් නිෂ්පාදනමවරයා ලෙස කටයුතු කරනුයේ,ජේෂ්ඨ මාධ්‍යවේදී ,සෑම් විමලධර්ම මහතා ය.වයඹ ප්‍රාදේශීය ජනතාවට අනන්‍ය වූ වැඩසටහන් ඉදිරිපත් කළ වයඹ හඩ ගුවන් විදුලිය ක්‍රි.ව.2011 වසරේදී වයඹ රේඩියෝ නමින් නවමු  ගුවන් විදුලි ආකෘතියක් මෙරටට හඳුන්වා දුන්නේ ය.

 ආරම්භයේ දී Fm 99.6 තරංග මාලාව ඔස්සේ ක්‍රියාත්මක වූ වයඹ රේඩියව එම තරංග මාලාවට අමතරව විදුල ළමා ගුවන් විදුලිය සතුවූ යටියන්තොට 102.6 තරංග මාලාව ද වයඹ රේඩියෝවට හිමිවිය .ක්‍රි.ව 2012 වන විට Imrb සමීක්ෂණ වාර්තාවලට අනුව ශ්‍රී ලංකාවේ වැඩිම පිරිසක් සවන් දෙන ගුවන් විදුලි නාලිකා 10 අතරට එක්වීමට හැකිවීම වයඹ රෙඩියෝ ලැබුණු භාග්‍යයකි.ඒ මෙරට ඉතිහාසයේ ප්‍රාදේශීය ගුවන් විදුලි සේවාවක් Imrb වාර්තා අතරට ආ පළමු හා අවසන් අවස්ථාවයි.ශ්‍රී ලංකා ගුවන් විදුලි සංස්ථාවේ ඉල්ලීම මත ශ්‍රී ලංකා විදුලි සංදේශ නියාමන කොමිසන් සභාවෙන් යටියන්තොට 90.1 ස්වාධීන තරංග මාලාව ද හිමිවිය. නමුත් ක්‍රි .ව.2013 වසරේදී ශ්‍රී ලංකා ගුවන් විදුලි සංස්ථාව මුහුණ දෙමින් සිටී සිටි දැඩි මූල්‍ය අර්බුදය මත ප්‍රාදේශීය සේවාවන්වල විකාශන කාලය කප්පාදු කළ අතර වයඹ රේඩියෝ ද උදෑසන පැය දෙකහමාරටත් සවස පැය දෙක හමාරටත් සීමාවිය මෙලෙසින් වයඹ රේඩියෝව නිශ්ශංක මාවතේ ගොඩනැගිල්ලක තවදුරටත් තබා ගැනීමට නොහැකි වටපිටාවක් නිර්මාණය වෙද්දී අවසන  වයඹ රේඩියෝව ටොරින්ටන් පරපරිශ්‍රයේ මැදිරියකට ගෙන යාමට තීරණය විය.

නමුත් එවකට පාලකවරිය වූ කුමාරි ගුණරත්න මෙනවියගේ දැඩි උත්සාහය මත එළවිටගම සෝමානන්ද නායක ස්වාමීන් වහන්සේගේ අමිල  පරිත්‍යාගයෙන්  වයඹ  රේඩියෝවට අස්වැද්දුම අභිනවාරාම විහාරස්ථානට අදාළ ගොඩනැගිල්ලක් හිමි විය.

එමෙන්ම වර්තමානය වන විට වයඹ  රේඩියෝව SLBC mobile app එකෙන් ද Radio Garden ඔස්සේ ද ශ්‍රවණය කළ හැකිය. එදා මෙදා තුර වයඹ රෙඩියෝ වෙතින් විකාශය වු වූ සහ විකාශනය වන වැඩසටහන් කිහිපයක් ලෙසින්,

• සුභ උදෑසනක්
• සිහිලැල් මියුරස
• ඉලන්දාරි හැන්දෑව                        
• හිත නැවතුන තැන
• හේලංකඩ
• වැව රවුම
• ළමා උයන
• සිප් මංසල 
• ටෙක්නිකල් වර්ල්ඩ්
• පිහාටු
• ස්වර්ණ ග්‍රන්ථ
• සළෙරු ගී                                  
• ආරෝග්‍යා

වයඹ  රේඩියෝ ස්වර්ණ ග්‍රන්ථ වැඩසටහන 

පෙන්වා දිය හැකිය.ඉතාම දුෂ්කර ගමනකින් ඇරඹි වයඹ රේඩියෝ ව මැයි 31 වැනි දින නිහඩ වීමට කටයුතු යෙදී තිබුණද මේ වන විට එය රැක ගනිමින් මෙරට ජනතාව අතර වයඹ රෙඩියෝව ජනතාව අතරට ගෙන ඒමට කටයුතු කරනුයේ වර්තමාන පාලක ධූරය හොබවන්නේ කුමාරි ගුණරත්න මෙනවියයි.

වයඹ රේඩියෝඩියෝ ටෙක්නිකල් වර්ල්ඩ් වැඩසටහන

    වයඹ රේඩියෝ  ළමා උයන වැඩසටහන

     වයඹ රේඩියෝ හිත නැවතුන තැන වැඩසටහන 

                                                                                                                                                             

  

                                                                                                      

ශ්‍රී ලංකාවේ ප්‍රාදේශීය ගුවන් විදුලි සේවා-3( කඳුරට සේවය)

  ලංකාවේ තෙවෙනි ප්‍රාදේශීය ගුවන්විදුලිය වන කඳුරට සේවය මධ්‍යම,ඌව, සබරගමුව, සහ වයඹ පළාත් ආවරණය වන පරිදි fm 90.1, 107.3, 107.5 තරංග මාලා ඔස්සේ මෙන් ම SLBC  Mobile App සහ Radio Garden ජංගම දුරකතනය ඔස්සේ ලොව පුරා සිටින සියලු ජනතාවට ශ්‍රවණය කළ හැකි පරිදි වැඩසටහන් විකාශනය කරයි.මෙය කන්ද උඩරට පිහිටි එකම විද්‍යුත් නාලිකාවයි. ක්‍රි.ව.1983 අප්‍රේල් මස 13 වැනි දින මහනුවර පුෂ්පදාන මාවතේ පිහිටි පරිශ්‍රය තුළ කඳුරට සේවය ස්ථාපනය විය. එකල ගුවන් විදුලි රාජ්‍ය අමාත්‍ය ආචාර්ය ආනන්ද තිස්ස ද අල්විස් මහතාගේ කාල සීමාව තුළ දී මෙම  මහනුවර සේවය ආරම්භ කරන ලදී.ආචාර්ය ආනන්ද තිස්ස ද අල්විස් මහතා ‍ප්‍රධාන ආරාධිත අමුත්තා වූ මෙහි නියෝජ්‍ය ඇමති  චන්ද්‍රා  කරුණාරත්න ,කතානායක ඊ. එල්. සේනානායක,  මහනුවර දිසාපති දමුණුපොළ , මහනුවර දිස්ත්‍රික් සංවර්ධන මන්ත්‍රී අන්නමලේ වැනි ප්‍රභූවරුන් ද මහනුවර සේවය විවෘත ක කිරීමේ උත්සවයට සම්බන්ධ විය.

 ක්‍රි .ව.1983 අප්‍රේල් 13 වැනි දා සිංහල අලුත් අවුරුදු උදාවේ පුණ්‍ය කාලයේ දී පස්වරු 04:32 ට යෙදුණු සුබ නැකතින් සෙංකඩගලින් මධ්‍යම තරංග  සහ අඹේවලින්  තරංග 531 ඔස්සෙ එවකට සිංහල සේවා අධ්‍යක්ෂ ව සිටි චිත්‍රානන්ද අබේසේකර මහතාගේ හඬින්  මුල්ම නිවේදනය නිකුත් කළේය. කඳුරට  සේවය ආරම්භයේ දී භාෂා තුනෙන් ම  වැඩසටහන් ඉදිරිපත් වූ අතර පස්වරු 6 සිට 7 දක්වා මුල්ම ඉංග්‍රීසි වැඩසටහන් ඉදිරිපත් කළේ හිල්ටන් පෙරේරා මහතා ය.ආරම්භක කාලයේ දී දෙමළ වැඩ වැඩසටහන් දක්ෂ නිවේදකයකු වූ කමලනාදන් මහතා විසින් ඉදිරිපත් කරන ලදී.

 ‍ශ්‍රී දළදා මාලිගාව කේන්ද්‍ර කරගත්  කන්ද උඩරට ආගමික හා සංස්කෘතික පසුබිම පිළිබඳ ගවේෂණාත්මක දැනුම් සම්භාරයක් ශ්‍රාවකයා වෙත පිරිනැමීම මූලික අරමුණ කරගනිමින් එළවළු හා කුළුබඩු ගොවීන්ට අවශ්‍ය තොරතුරු සම්පාදනය, මධ්‍යම කඳුකරයේ සිටින කලාකරුවන්ට තම නිර්මාණ එළිදක්වන්නට මහනුවර සේවය කදිම තෝතැන්නක් විය.

 ‍ප්‍රාදේශීය අවශ්‍යතාව  ඉස්මතු කරමින් විකාශනය වූ ආරම්භක වැඩසටහන් අතර වාහල්කඩ, කවිකාර මඩුව,  උඩවැඩියා මල් ,යොවුන්  සැදැල්ල, ඉතාම ජනප්‍රිය වේ. හිල්ටන් පෙරේරා, සුමනා ජයතිලක ,කුමාර රත්නායක, සිසිල් ජිනදාස ,සමන් ජයරත්න යනාදින් ආරම්භයේ සිට මහනුවර සේවයේ සේවය කළ පාලකවරුන් අතරින් කිහිපදෙනෙකි.ජනප්‍රියට පත් නිවේදකයන් ලෙස,

• එස්.ලියනගේ.
• සිසිල් ජිනදාස
•  සුගත් වීරසිංහ 
•  කපිල .එම්. ගමගේ
•  නන්දා  රඹුක්වැල්ල
•  මල්ලිකා හේම කුමාරි පෙරේරා

සඳහන් කළ හැකිය. සිංහල දෙමළ භාෂා දෙකෙන්ම ආමන්ත්‍රණය කරන එකම ප්‍රාදේශීය නාලිකාව වන කඳුරට සේවය දිනපතා පෙරවරු 5.30 සිට රාත්‍රී 9.30 දක්වා අඛණ්ඩ ව සජීවී විකාශනයක් ක්‍රියාත්මක කෙරේ. එමෙන් ම  කඳුකරේ අලුත් තොරතුරු ගෙන එන "කඳුරට පුවත්"," මුතු පවුර "ඇතුළු නිර්මාණශීලී වැඩසටහන් රාශියක් මෙම සේවය  මගින් ගෙන එන අතර "SLBC මාධ්‍ය ඇකඩමිය"නමින් කොත්මලේ පුහුණු ආයතනයක් ද පවත්වාගෙන යයි.

 කදුරට සේවය ඉදිරි කටයුතු උදෙසා  ශ්‍රී දළදා මාලිගාව ,පේරාදෙණිය විශ්වවිද්‍යාලය , ගන්නෝරුව කෘෂිකර්ම දෙපාර්තමේන්තුව ,ශ්‍රී ලංකා මහ බැංකුව ආදි ආයතන සහයෝගයක් ලබා දෙන අතර වැඩිම ආවරණ කලාපයක් හිමි එකම ප්‍රාදේශීය ගුවන් විදුලි සේවාව වනුයේ ද කඳුරට සේවයයි.

වැඩිදුර තොරතුරු සඳහා=https://www.facebook.com/profile.php?id=100063454428381&mibextid=ZbWKwL

ශ්‍රී ලංකාවේ ප්‍රාදේශීය ගුවන්විදුලි සේවා -2 ( රුහුණු සේවය)

 ශ්‍රී ලංකා ගුවන්විදුලි සංස්ථාවේ සංස්ථාවේ කාර්යභාරය සපථ කරලීමේ අරමුණින් ප්‍රාදේශීය මට්ටමින් දෙවනුව ආරම්භ වූගුවන් විදුලි නාලිකාව වූයේ,මාතර රුහුණු සේවය යි.ක්‍රි .ව.  1980 පෙබරවාරි 3 වෙනිදා පස්වරු 3.30ට  සෙත් පිරිත් සජ්ජායනය මැද්දේ එවකට අධ්‍යක්ෂ ජනරාල් තේවිස් ගුරුගේ මහතා රුහුණු  සේවයේ ආරම්භක  නිවේදනය කළේය.

 වර්තමානයේ ගාල්ල , මාතර ,හම්බන්තොට, මොනරාගල, බදුල්ල ,අම්පාර ,රත්නපුර  යන දිස්ත්‍රික්වල බොහෝ ප්‍රමාණයක් රුහුණු සේවයේ ශ්‍රවණ කලාපයට ඇතුළත් වේ. එලෙසින් ම රුහුණු සේවය හෙවත් රුහුණේ  අභිමානය දෙනියායෙන් මෙගාහර්ට්ස් 107.3 හපුතලෙන් මෙගාහර්ට්ස් 107.5 ඔස්සේ ශ්‍රාවක සමූහයා සමග ගණුදෙනු කරනුයේ, ශ්‍රාවකයා තුළ සම්භාවනාවට පාත්‍ර වෙමිනි.

  තව දුරටත් රුහුණු සේවය පිළිබඳ සලකා බැලීමේදී ක්‍රිස්තු වර්ෂ 1987 රටේ  පැවැති කලබලකාරී තත්වය රුහුණු සේවයට බලපෑවේය. කලහාකාරී පිරිස් ක්‍රිස්තු වර්ෂ 1987 ජූලි 29 වැනි දින රුහුණු සේවයට කඩාවැදී ගිනි තබා මහත් විනාශයක් සිදු කරන ලදී.

නමුත් කිස්තු වර්ෂ  1993 දෙසැම්බර් 12 වැනි දින නව මැදිරි සංකීර්ණය විවෘත කරමින් රුහුණු සේවා විකාශනය කටයුතු යථා තත්ත්වයට පත් කරන ලදී. පොකුණු සේවයේ පළමු අධ්‍යක්ෂවරයා වූයේ ශ්‍රීපාලි වයමන් මහතා ය. එමෙන්ම  හිල්ටන් පෙරේරා, කොල්වින් ජයවීර මහතා වැනි කිහිප දෙනෙක් රුහුණු සේවය ප්‍රගමනය වෙනුවෙන් කටයුතු කරන ලදී. එමෙන් ම  ප්‍රාදේශීය අනන්‍යතාවය සුරකමින් සිහින සිත්තම, සදමිණි විල ,රුහුණු ගුරු ගෙදර වැනි වැඩසටහන් විකාශනය වේ.

 යහපත් ගුණාත්මක ඉහළ රස්වින වින්දනයකින් යත් මාධ්‍ය මෙහෙවරක නියැළීම මාධ්‍ය මෙහෙවර කර ගත් රුහුණු සේවය මැයි 31 වෙනි දින අවසන් කිරීමට නියමිත වුවද රුහුණේ ප්‍රෞඩ වූ සංස්කෘතිකාංග  රැකගනිමින්  ගුණාත්මක  මාධ්‍ය මෙහෙවරක නියැලෙමින් සිටී.

 තවදුරටත් තොරතුරු විමසා බැලීමට=https://www.facebook.com/RuhunuSewaya?mibextid=ZbWKwL

ශ්‍රී ලංකාවේ ප්‍රාදේශීය ගුවන්විදුලි සේවා-1 (රජරට සේවය)

 

     මෙරට ප්‍රාදේශීය ගුවන් විදුලි සේවා අතරින් ජනහද හඳුනාගත් පළමු ප්‍රාදේශීය ගුවන් විදුලි සේවාව මෙන් ම  කීර්තිමත් කලාකරුවන් සහ ව්ද්වතුන් රාශියක් බිහි කළ ජනතාවගේ නොමද ගෞරවයට පාත්‍ර වූ සන්නිවේදන ආයතනයක් ලෙස රජරට  සේවය පෙන්වා දිය හැකිය ක්‍රි .ව.  1979 අප්‍රේල් මස 12 වැනි දින පෙ.ව.9:30 ට යෙදුණු සුබ මොහොතින් රජරට සේවය ආරම්භ විය.අනුරාධපුර ගුවන් තොටුපොළ  ආසන්නයේ කුඩා මැදිරියක ආරම්භ කළ රජරට සේවයේ  ප්‍රථම අධ්‍යක්ෂවරයා වූයේ, කොළඹ ප්‍රධාන කාර්ය කාර්යාලයේ ‍ප්‍රවීණ ප්‍රවෘත්ති නිවේදකයකු වූ සිරිල් රාජපක්ෂ මහතා ය. මෙහි දී රජරට සේවය ආරම්භ කිරීම උදෙසා ගුවන්විදුලි සංස්ථාවේ සභාපති ඒමන් කාරියකරවන සහ අධ්‍යක්ෂ ජනරාල් තේවිස් ගුරුගේ යන මහත්වරු සහභාගී වූහ.

 ගුවන්  කාලය ආරම්භයේ දී සතියේ දිනවල පෙ.ව. 5 සිට 8 දක්වාත් ප.ව.4:30 සිට 10.15 දක්වා විය. සෙනසුරාදා සහ  ඉරිදා පෙ.ව.5 සිට දහවල් 1 වනතුරු සහ ප.ව.4.30 සිට රාත්‍රී 10.15 දක්වාත් වැඩසටහන් විසුරුවා ඇත. රජරට ගුවන් විදුලිවිදුලි සේවය ආරම්භ වන විට ප්‍රාදේශීය සේවාවක අත්දැකීම ලැබූ කිසිවෙකු නොසිටි බැවින් සේවාව ආරම්භ කළ පසු එහි අත්දැකීම් මත පදනම් වෙමින් උචිත වැඩසටහන් ඉදිරිපත් කිරීමේ වගකීම එහි සාමාජිකයන්ට පැවැරිණි.මෙහි දී වැඩසටහන් අංශයේ සිටි අය වශයෙන්,

•  විජයානන්ද ජයවීර
• ස්වර්ණ ශ්‍රී බණ්ඩාර
• ප්‍රේමකීර්ති ද අල්විස්
•  සේන ගුණසේකර 
• සුනිල්  විජේසිංහ
• හරිස්චන්ද්‍ර පෙරේරා 
•  කුමුදු සෙනෙවිරත්න

 වැනි අය පෙන්වා දිය හැකියි. එමෙන්ම නිව්ටන් ගුණසේකර ,කුලසේන ෆොන්සේකා,ඇන්තනි  ජයමාන්න වැනි අය ප්‍රවෘත්ති අංශයෙන් දායක වී ඇත.අනුරාධපුර සිට  විකාශනය කළ  රජරට  සේවය කිලෝ හර්ට්ස් 801  මධ්‍යම තරංග ඔස්සේ මහව සිට  විකාශනය විය. එතැන් සිට රජරට සේවයේ ශ්‍රවණ කලාපය  සත්කෝරළය දක්වා ම පුළුල් විය.පසුව එනම් ක්‍රි.ව. 1987 ජනවාරි 24 වෙනි දින රජරට සේවය සඳහා නව මැදිරියක් ලැබුණු අතර එතැන් සිට කිලෝ හර්ට්ස්  639 ඔස්සේ තව දුරටත් විකාශනය පුළුල් විය. පසුව  1997 කරගහතැන්න සම්ප්‍රේෂණ ඔස්සේ fm 102.4MHz තරංග මාලාව ඔස්සේ රජරට සේවය පැහැදිලිව රජරට, වයඹ ,ඌව ,මධ්‍යම ,නැගෙනහිර ආදි ප්‍රදේශ රැසකට ව්‍යාප්ත විය.

 රජරට සේවය හෙවත් නුවර  කලාවියේ සරසවිය නිරන්තරයෙන් ම රජරට ශ්‍රාවකයාගේ අනන්‍යතාව ආරක්ෂා  කරගනිමින් වැඩසටහන් නිෂ්පාදනය කළ ගුවන්විදුලි සේවයකි. රජරට සංස්කෘතික චාරිත්‍ර වාරිත්‍ර හා කෘෂිකාර්මික අර්ථ ක්‍රමය මෙන් ම භාෂාව පිළිබඳ අවධානය යොමු කරමින් ජන විඥානය හඳුනාගත් වැඩසටහන් ජනතාවට ලබාදීමට රජරට සේවය ආරම්භක සාමාජිකයෝ යොමු වූහ.ක්‍රි.ව.2012 ගුවන්විදුලි සංඛ්‍යාත ‍ ප්‍රතිව්‍යූහගතකරණය 107.3 MHz තරංග මාලාවට රජරට ගුවන් විදුලිය මාරුවිය.එසේම 90.1MHz ඔස්සේ අනුරාධපුර සම්ප්‍රේෂණය ඔස්සේ ද රජරට ගුවන් විදුලිය ආවරණය කරයි.

          රජරට ගුවන් ගුවන්විදුලි අනන්‍යතාව රැක ගත් වැඩසටහන් ලෙස පිලේ පැදුර,නිර්මාණි, සම්භාෂා, දැනමුතු අන්දරේ ,දීපවංශය, කමත,සන්නස,  රජරට රග මඩල, රජරට කැකුළු, ගම් සභාව පෙන්වා දිය හැකියි. රජරට සේවයේ ස්වර්ණමය යුගය වූ  ස්වර්ණ ශ්‍රී බණ්ඩාර යුගය රජරට සේවා ඉතිහාසයේ අමරණීය වූ යුගයකි. පිලේ පැදුර වැඩසටහන අත්තප්පා ලෙස පොදු ජන මනසට ආමන්ත්‍රණය කරන්නට ඔහුට හැකි විය.

 එමෙන් ම රජරට කැකුළු නමින් දීප ව්‍යාප්ත ව  ආධුනික ගායන හැකියාව ඇති ශිල්පීන් වෙනුවෙන් දියත් කළ වැඩසටහනින් පසුකාලීන ව ලාංකික ගායන පරපුරට සුවිශාල ගායක ගායිකාවන් පිරිසක් දායාද කරන ලදී.ජන හද අමතන ප්‍රථම ප්‍රාදේශීය  ගුවන්ගුවිදුලිය  වූ රජරට  සේවය සුවිශාල කලා පිරිසක් මෙරට කලා කෙතට බිහි කළේය. ඔවුන් අතර,

•  ගුණදාස කපුගේ
•  මහින්ද  දිසානායක
•  මහින්ද චන්ද්‍රසේකර
•  කරුණාරත්න දිවුල්ගනේ
•  නන්දා උඩවත්ත 

 ඉන් කිහිප දෙනෙකි.  එමෙන්ම රජරට සේවය ක්‍රි.ව. 2002 වසරේ දී රජරට fm බවට පත්විය.නමුදු ක්‍රි.ව.2023 මැයි 31 වැනි දින සියලු ම  ප්‍රාදේශීය සේවා වැසීමට ගිය ද නැවතත් ‍ප්‍රාදේශීය අනන්‍යතාව සුරකිමින් රජරට සේවය දීප ව්‍යාප්ත ව විකාශනය වෙමින් පවතී.

 රජරට සේවයේ තේමා ගීතය